俗語有話「屁股決定腦袋」，原來真係啱嘅。最近升官坐正做政制及內地事務局局長嘅譚志源（Raymond），尋日首次以局長身份出席立法會政制事務委員會，估唔到一坐呢個位，就即刻好似前任林瑞麟（林D9）一樣，變身成為「人肉錄音機」，被問到替補機制、區議會委任制等敏感問題時，都係你有你講，佢有佢播帶，激到班議員紮紮跳。
會議上，除咗工聯會王國興祝Raymond好運外，其他議員就狠狠「招呼」佢。好似廠商會代表林大輝一開始就話Raymond做到局長未必係好事，因為呢個係「三煞位」，好多火頭要處理。之後大輝問Raymond幾時會檢討政治委任制度，但Raymond似乎學足前任不停播帶嘅做法，重複幾次話政府喺適當時候就會有建議。最後大輝發火，話上一任局長只係識帶議員「遊花園」，唔想新局長都係咁樣，但Raymond都係繼續重複答案。睇嚟議員都係慳番啖氣好過。