政情：梁志群難忘搬屋避賊
太古旅遊董事總經理梁志群（Andrew、圖），一直有就旅遊業發展提出意見，亦被盛傳明年會挑戰立法會旅遊界議席，佢尋日就話目前言之尚早，但可以肯定嘅係，佢會參加嚟緊嘅特首選舉委員會界別選舉，○六年佢仲係政壇初哥嘅時候，就以第二高票數成功當選選委。
Andrew喺太古打咗三十幾年工，曾做過可口可樂內地嘅推廣工作，又做過太古保險，依家轉做旅遊，可謂周身刀。打開佢張卡片，詳列嘅公職及其他職銜多達九個，當中不少係同旅遊有關。入行咁耐，最令佢難忘嘅經歷係八十年代派駐新畿內亞三年，喺呢個水清沙幼嘅地方佢學會潛水，爭一級就可以考埋個教練牌，佢話好享受日日同啲魚一齊游水嘅快樂日子。
不過，Andrew喺當地就曾經被賊人入屋打劫，雖然成功將賊人擊退，但其後回港一趟再返到當地，就發現屋企嘅嘢被賊人搬走晒，最後要搬屋避賊，至今仍相當難忘。