政情：D姐亂拋書包撐消防？
立法會公務員委員會尋日開會討論設立侍產假嘅細節，但消防處救護員會前主席屈奇安被拒出席消防處部門會議事件就變成會議重點，多名議員質詢公務員事務局局長俞宗怡（D姐）。D姐解釋話，參加會議嘅代表人士要係紀律部隊嘅在職人員，又話內部會議可能涉及機密資料討論，所以有非現職人員在場唔係咁方便喎。
不過，由香港公務員總工會聯合會主席轉任總幹事嘅梁籌庭及香港政府華員會會長黃河都有參與所屬嘅相關部門會議，梁籌庭話從未聽過D姐口中嘅規矩，仲叫當局攞啲條文出嚟睇吓喎！社民連議員「長毛」梁國雄就話，屈奇安資歷咁深，點解會唔畀佢參加部門會議。
消防處救護員工會十五個代表就趁尋日立法會開會，走咗去新立法會大樓外示威，先後向四名議員遞交請願信，指屈奇安自從五月退休後，消防處就阻止佢出席部門會議；救護員代表都話，消防處咁做好明顯係好唔合理。屈奇安將代表新民黨出選黃大仙區議會新蒲崗選區，其他候選人仲包括李達仁及社民連梁日明。