如果有得選特首，你會選邊個呢？港大民意研究計劃今個月進行嘅最新民調顯示，有超過四分之一受訪者支持梁振英（CY）任下屆特首，大幅拋離唐英年（唐唐）。CY近排踎完天橋底後，支持率就如搭直升機，由七月份嘅百分之八爆升至百分之二十九，升上榜首，但同樣係落區，唐唐嘅支持率就以龜速前進，由百分之十升至百分之十四，支持率都只有CY嘅一半。
調查仲話，有兩成半受訪者因為唐唐嘅「感情缺失」而對佢有負面睇法。至於支持度由三成二暴跌至一成九嘅全國人大常委范徐麗泰，就回應話：「民望有升有跌，民望不可恃。」
CY同唐唐近日頻頻落區，前日仲一齊落深水埗聽基層訴苦，撞到正一正。據聞呢種「撞區」情況會陸續有來。好似鄉議局本周六就會舉行村長代表大會，屆時會請埋佢哋出席，聽吓班鄉紳有乜意見。不過，原來雙方都唔知道對方會同場出現，聽到呢個消息後都大吃一驚。兩人同台演出，到時實有好戲睇。唐唐今日會到一間官津中學探訪，CY就小休幾日，飛到英國出席囝囝嘅大學畢業典禮。