中環出更：工總青委鐵三角大有來頭
商會紛紛年輕化，工業總會都宣告成立青委會，由工總前主席孫啟烈大公子孫榮聰（Eric）做首任主席，「德國寶」創辦人陳國民囡囡陳嘉賢（Karen）及工總副主席劉展灝大仔劉燊濤（Gary）就擔任副主席，仲有立法會議員林健鋒公子林凱章擔任執委。
幫家族打理生意
青委會由上月中成立至今，已招收咗七十名成員，為工業界注入年輕嘅新動力。
新主席Eric來頭不小，畢業於澳洲新南威爾斯大學，主修工商管理，畢業後曾任職德意志銀行、香格里拉酒店集團等，○六年加入家族品牌「Kinox健樂士」，主力研發、生產同銷售高級廚具及電器，認真叻仔。副主席Karen畢業於美國華盛頓大學，現時係德國寶副總裁，除咗幫爸爸手拓展家族業務，仲喺浸大攻讀工商管理博士。
至於Gary，係英國University of Kent嘅高材生，留學回港後，幫家族打理鐘錶生意。呢個鐵三角組合咁強，嚟緊一定有一番作為。Eric話，會舉辦更多活動，讓年輕工業家聚首一堂。
卓妮