乜嘢叫融合？融合即係融化匯合，成為一體咁解。所以顧名思義，教育局推行嘅融合教育，亦即係要求學生不分彼此，你中有我，我中有你，融融洽洽，和和諧諧，大家合皮。
可惜，世事邊有半斤八両咁理想吖。呢，官老爺愈嗌融合，偏偏就愈唔融合，結果搞到學生分化，學校難做，甚至頻頻發生悲劇添。平機會就周不時接到投訴，連主席林煥光亦忍唔住批評融合教育失敗，教育局欠缺專業支援及配套，根本係攞嚟搞。
之不過，雖然平機會聲稱兩個月前已向當局反映融合教育等各種問題，但教育局一於詐傻扮懵，完全冇反應，唔怪得林煥光滿腹牢騷，準備約見教育局局長孫明揚，要求交代咁話。其實，就算教育局肯交代又點吖，港府官員最叻就係耍太極，耍耍吓，大事化小，小事化無，最後咪又係不了了之。
講起融合教育，確實係幾無厘頭，呢項已經推出十二年嘅教育政策，話就話係鼓勵殘障及特殊學習困難學生就讀主流學校，盡快融入社會，口號就好聽喇，「共融社會，由學校做起」喎。可惜，現實同理想往往背道而馳，學校做起，教局懶理，嘥氣！
講真，鼓勵殘障及特殊學習困難學生入讀主流學校，增強自信，融入社群，出發點係幾好嘅。弊就弊在教育官僚眼高手低，美其名話融合教育，實際係縮骨卸膊，將有特殊需要嘅學生推畀學校就關人個關。結果融合不成，反而製造矛盾，添煩添亂。嗱嗱嗱，舊年有位患思覺失調嘅中四男學生懷疑與同學及老師相處出問題，喺學校墮樓身亡，畀死因庭裁定死於自殺，呢單悲劇咪就係融合教育引起嘅咯。正如教育界人士話齋，呢啲唔單止係學生嘅悲劇，亦係融合教育嘅悲劇。
官不殺伯仁，伯仁因官而死吖！中四學生年紀輕輕走上絕路，究竟誰之過，各位教育高官有冇好好反省？有冇感到羞愧？其實，今次事件仲係冰山一角嘅咋，香港教育制度烏龍百出，教育政策朝令夕改，教育亂象無日無之，莘莘學子淪為白老鼠，受害嘅又點止呢位犧牲者吖。
講到尾，教育官僚腦殘，做嗰樣衰嗰樣，叫佢哋檢討融合教育，改善教育政策，莫講話難過登天，就算佢哋肯檢討，隨時仲衰多幾錢重，咁豈不是弄巧反拙？所以咯喎，林煥光都係慳番啖氣好過，與其嘈嘈閉，不如先搞掂平機會自己內部嘅亂象喇。