唐英年婚外情醜聞鬧得熱烘烘，好多「過來人」都唔敢多作評論，就連曾經因為婚外情而辭去特首辦主任一職嘅現任平等機會委員會主席林煥光（WK），都不願多談此事。WK尋日出席一個推廣傷健共融嘅活動，被問到點睇唐唐嘅婚外情時，佢一聽「婚外情」三個字即刻變成驚弓之鳥，好大反應兼耍手擰頭話唔想評論件事，話呢啲嘢都係留番畀大眾去評論喎！
