政情：葉劉倡生育收大利是
工聯會近期加大力度，猛推男士侍產假，呢個話題延續到尋日佢哋舉辦嘅勞工權益論壇，獲邀出席嘅新民黨主席葉劉淑儀，唔單止大力贊成設立侍產假，更即場建議政府喺財政儲備充裕下，應該考慮向生育嘅市民派大利是，即時獲得唔少掌聲。
葉太喺論壇上提到，侍產假技術上同運作上都冇大問題，只要政府有決心就一定推行到，佢仲語帶雙關話，反正政府咁鍾意推行一次性措施，咁就不如索性每次生ＢＢ都派封大利是喇，當係幫補吓奶粉錢都好嘛。雖然葉太呢個建議唔算石破天驚，但喺侍產假外加多項福利，相信好多人都啱聽。
不過，葉太對標準工時立法就有保留，佢話唔少律師行、投資銀行嘅精英，每日工時好長，但人工就好高，有啲人想力爭上游，一旦限制工時只會適得其反，所以唔應該一刀切限制晒所有工種，將來即使立法亦要從長計議喎。