港大學生李成康早前出席港大百周年慶祝活動期間，曾被警方禁錮而聲名大噪，隨即被網民大起底，發現佢曾經係白鴿黨成員，之前仲有傳佢考慮參選區議會。最近，網上又流傳一張同李成康有關嘅相片，相中有佢同白鴿黨議員李華明、已報名參選觀塘秀茂坪南選區嘅李耀基，一同到運輸署遞交請願信，但當中最離奇嘅係李成康個樣被朦化了。
莫非白鴿黨擔心李成康搶風頭？抑或覺得佢被禁錮後已變成負資產呢？有份合照嘅李耀基話，李成康被朦化同負資產冇關，因為其實張相係喺今年一月時影嘅，當時對方係白鴿黨兼職員工，但依家已退出白鴿黨，所以喺冇佢授權嘅情況下，決定朦化咗佢個樣。李耀基仲打趣話，如果李成康肯幫自己助選，肯定係正資產添！
不過，李耀基以前讀大學都搞過學生會，知道學生會最重要保持獨立性，所以都冇打算搵李成康幫手助選喎。同區其他已報名嘅參選人仲有民建聯麥富寧。