政情：煲呔曾死薦鬍鬚曾做CS
為官者最緊要有自知之明，但煲呔曾任內七年好大喜功，淨係用人唯親，為自己友爭上位機會。據聞一直有意扶植鬍鬚曾上位嘅煲呔曾，最近更睇準時機向北京死薦鬍鬚曾接替唐英年做政務司司長（CS），但奈何鬍鬚曾爛泥扶唔上壁被北京否決，而民望極低嘅林瑞麟（林D9）反被支持接任。睇嚟鬍鬚曾都係上位無望，都係疊埋心水執定包袱等走人好過啦！
煲呔曾同鬍鬚曾情同兄弟，喺政圈係公開秘密，煲呔曾一有機會就千方百計扶持鬍鬚曾一把，好似○七年競選連任後，政圈盛傳佢想搵鬍鬚曾做CS，成為佢嘅左右手兼港府「冧巴吐」，因北京拒絕，所以退而求其次做財政司司長。近年煲呔曾更突然造王者癮大發，有意捧鬍鬚曾做下任特首，但奈何鬍鬚曾今年炮製「史上最廢」預算案，當中為強積金注資六千元更被全城鬧爆，最終要派發六千元平息民憤，特首夢至此亦行人止步。
借反對林D9聲音過橋
不過，煲呔曾並未因而放棄鬍鬚曾，據聞較早一段時間，煲呔曾趁唐唐請辭CS參選特首，於是向北京建議由鬍鬚曾頂上，但有關建議好快就宣布難產，有人估計同鬍鬚曾冇得過渡至下屆政府，以及另覓財爺人選難度有關，但亦有講法話鬍鬚曾能力有限，擔心佢上任CS後搞禍檔攤。
及至上月下旬，政圈瘋傳唐唐好快請辭，並由林D9接任，包括全國人大常委范徐麗泰在內多名政界人士對此好有意見，據聞煲呔曾即時睇準時機，借政界反對林D9嘅聲音「過橋」，為鬍鬚曾上訴，但最後都係無功而還，呢啲名副其實係自己攞架嚟丟。有講法話，北京已睇中林D9好耐，並非臨時拉扶隨便搵佢頂上。
有傳話唐唐原定上月十九日宣布辭職，當傳媒廣泛報道後，外訪返港嘅煲呔曾知悉後大怒，估計係佢唔鍾意被外界洞悉政府內部運作有關，剛愎自用嘅佢於是逼唐唐押後辭職，倘若傳聞屬實，相信又係煲呔曾小器嘅又一例證。