中環出更：袁莎妮累肥胡 「中頭獎」
俗語話紅顏禍水真係冇錯，早前幾個大商會搞咗個講《競爭法》聯席座談會，香港總商會主席胡定旭同新任總裁袁莎妮（Shirley）都有出席，但當日肥胡被Shirley搶晒風頭不特止，當傳媒追訪Shirley嘅熱爆緋聞時，就有電視台攝影師唔小心將部攝影機撞埋肥胡個頭度，肥胡當堂痛到嗌救命。
畀攝影機扑親
話說當日座談會開始前，肥胡接受傳媒訪問，發表對競爭法嘅意見，但講講吓嘅時候，佢嘅新拍檔Shirley就突然出現，一班傳媒於是丟低肥胡，一窩蜂衝過去追訪Shirley。點知混亂之間，有電視台攝影師唔小心將部攝影機撞到肥胡左邊頭，肥胡即刻痛到嗌救命，好彩冇流血咋。據講「襲擊者」都有加以慰問同耍冧。
自從總商會請咗捲入婚外情緋聞嘅Shirley後，只要有Shirley出席嘅場合都有傳媒追訪，已經搞到周身唔得閒。今次肥胡仲因為伊人當災，睇嚟「紅顏禍水」呢句說話真係冇錯。