中環出更：福建幫就職 林峯Chok暈粉絲

香港有超過一百萬個福建人，唔少大家熟悉嘅城中名人都係閩籍人士，例如恒生銀行女大班梁高美懿（Margaret）、內地「房地產首富」世茂集團董事長許榮茂、藝人「Chok王」林峯等。當晚林峯一出現就引起騷動，雖然佢蓄意低調，同本身係聯會常務會董嘅爸爸林華國坐埋一邊享用自助餐，但係逃不出眼利嘅粉絲法眼，成晚不停被要求影相，佢對粉絲有求必應，抵佢咁受歡迎喇！

前仁濟醫院主席董吳玲玲都喺度，佢喺九月底剛接任晉江同鄉會會長，成為福建幫難得一見嘅女會長，當晚又升呢出任聯會副主席，雙喜臨門，難怪成晚笑容燦爛。佢同Margaret都係出色馬主，經常為名下愛駒拉頭馬，見面分外親切。

福建聯會青委骨幹成員，左起林智彬、盧金榮、楊華勇、施榮忻及黃楚恒。

福建幫大佬盧文端（右二）及林樹哲（左二），同鄉親梁高美懿（左一）及董吳玲玲（右一）開心合影。 （余素月攝）

梁高美懿打聽財爺人選

Margaret見到消息靈通嘅全國政協盧文端，好肉緊打聽下屆財政司司長人選，反而對特首、政務司司長唔係好着緊，佢笑言心目中梗係財爺最重要啦！咦？江湖曾有傳言滙豐亞太區行政總裁王冬勝係人選之一喎，Margaret笑而不語，答案盡在不言中。

卓妮