中環耳目：理大總裁協會齊歎新派意菜
識搵錢又識得使錢，至係懂得享受人生。早前一個晚膳時間，剛接任電子業商會會長嘅富士高實業老細楊志雄，同十幾位老友相約喺銅鑼灣米芝蓮食肆The Drawing Room，齊歎精緻新派意大利菜。原來是夜係理工大學轄下總裁協會（CEO Club）聚會，身為協會理事長嘅楊志雄梗要撐場。
CK拍板 叫好叫座
出席當晚飯局嘅包括「假髮大王」兼協會副理事長趙振國（CK）、電子業商會榮譽會長陳其鑣夫婦、電子業商會副會長洪劍峰伉儷及囡囡洪樂琳等。家族由清朝開始經營假髮生意嘅CK，一向識飲識食，由佢負責協會成員一年四次嘅飯敍，叫好又叫座，難怪一班老友不離不棄。楊志雄對當晚嘅頭盤香煎鵪鶉配鵝肝讚不絕口，CK就勁讚主菜燴和牛面頰配香煎牛脷冇得彈。餐廳嘅老細之一係中華廠商會董梅應春嘅囝囝梅慶豐，個個都對餐廳有讚冇彈。
卓妮