奧尼爾吹水好搵過打波
運動員生涯短暫，基本上參與主流體育嘅運動員，「三字頭」就要諗定後路，而最熱門嘅轉工行業，都離唔開教練或者評述員。其實美國及歐洲嘅傳媒機構向來視呢班「退休人士」為瑰寶，皆因「紅褲子」專業之餘，又吸引到觀眾，就好似剛退休嘅NBA一代中鋒奧尼爾，早前就獲多間電視台斟介做講波佬。
奧尼爾上季因為傷患纏身，宣布結束長達十九年嘅NBA生涯，殊不知「巨無霸」退役之後仲多人爭，事關佢一向風趣幽默，近年又做過電視節目識得搞氣氛，當NBA評述員肯定成為收視保證！因此多間電視台包括ESPN及TNT都誠邀佢「復出」講波，當然唔少得銀彈攻勢啦，結果奧尼爾思前想後決定加盟TNT，同曾經係場上敵人嘅「惡漢」巴克利做拍檔，令觀眾大為期待。
當傳媒知道TNT成功組得「奧巴配」後，已經立即用「夢幻組合」嚟形容兩人，全因兩位仁兄「吹得」之餘，風格亦大為不同。一個抵死，一個敢言，肯定會擦出火花，所以價錢貴啲都值得。奧尼爾表示，因為打咗NBA十九年，經常成為被批評對象，乜嘢難聽說話都領教過，所以佢就唔會為踩而踩，反而盡心為球員討回公道及提供娛樂性為主。
價碼勁過巴克利
至於巴克利「轉行」後，近年已成為最Top嘅講波佬，全因為「惡漢」有嗰句講嗰句，完全唔怕得罪人，而且巴克利「貼波」亦有一手，上季就貼中達拉斯小牛奪得冠軍，所以好多人都叫佢「生神仙」。據悉巴克利年薪都有千萬美元，計落好過攞NBA幾百萬嘅「老人合約」啦！至於奧尼爾份約雖然冇透露細節，但市場估計以奧尼爾嘅知名度，相信一定係講波界最貴嘅一份合約，好搵過佢留喺NBA。