自作孽，不可活。壹淫媒推出鹹濕《爽報》誨淫誨盜，激起全城怒火，團體抵制，政黨抵制，屋苑抵制，學校抵制，港人齊聲說不。淫賤黎神憎鬼厭，淪為如假包換嘅坑渠老鼠，都算折墮咯！
正所謂，眾怒難犯。截至周五，影視處已收到一百二十八宗關於《爽報》內容不雅、淫褻、暴力及賭博嘅投訴，喺群情洶湧之下，該處總算識驚，主動將鹹濕《爽報》送去淫審處評級。尋日，評級結果終於有喇，其中一日嘅情色小說，同埋連續兩日嘅網上聲音版被暫定為第二類物品，即係不雅咁解。
何謂「不雅」？等功夫茶不厭其詳為大家解釋吓喇。根據《淫褻及不雅物品管制條例》，被淫審處評為不雅嘅物品，不得向十八歲以下人士發布，包括派發、傳閱、交給公眾人士等，而且物品必須有封套，封面及封底除咗要有警告字句，仲要載有出版人資料添。好明顯，《爽報》完全唔符合條例嘅要求，咁會有乜嘢後果呢？後果就嚴重咯，任何人發布不雅物品罪名成立，首次定罪最高罰款四十萬元及監禁一年，如果再犯嘅話，最高罰款八十萬元及監禁一年。
嗱，條例就有喇，罰則亦唔算輕，當局究竟會唔會依法辦事，執正嚟做呢？咁就十分之令人懷疑囉。大家都知，香港地餘孽當道，漢奸猖獗，港府一向同淫賤黎沆瀣一氣，最鍾意玩包庇呢家嘢。呢，咁多年來，壹淫媒觸犯《淫褻及不雅物品管制條例》而被定罪嘅個案已經有一百一十六宗咁多，案底仲厚過電話簿，但當局從來冇一次認真處理，餐餐都係輕輕放過，罰款不過一萬幾千，更加從來冇人因此坐過一日監，同法律規定嘅罰則簡直差天共地。當局百擒百縱，淫賤黎更加有恃無恐，唔怪得香港畀佢搞到烏煙瘴氣喇！
正如學者宋立功話齋，當局對壹淫媒嘅罰則過輕，全無阻嚇作用，壹淫媒早就視之為經營成本一部分，一於繼續宣淫。仲有吖，當局次次檢控淫媒都係一拖再拖，根本同放生冇乜分別。
更令人嘆為觀止嘅係，港府除咗玩包庇，仲好鍾意玩雙重甚至三重標準添。例如○五年嘅Kelly Brook事件咁，刊登同一輯外國女星性感照片，《東方日報》及《太陽報》被評為二級不雅，而爛果報就被評為一級非不雅，有本喺香港出售嘅外國雜誌刊出冇遮冇掩嘅性感照，竟然連送檢都慳番。港府親疏有別，包庇淫媒，打壓正義，如果話冇政治目的，你信唔信吖？
講番《爽報》宣淫，淫審處今次又係例牌搵一張銷量唔多嘅報紙公布評級結果，好似唔想畀人知咁，究竟有乜嘢居心呢？點解唔刊登喺全港銷量最多嘅報紙呢？如果淫審處畀唔起廣告費咯喎，咁咪由政府新聞處喺網上公布囉，何必鬼鬼祟祟、閃閃縮縮呀！
無論點都好，《爽報》宣淫犯眾憎，依家既然被暫評為不雅，跟住就要睇司法機構點做喇。嗱，千祈咪再玩包庇吖，如果唔係，遲早同淫賤黎一齊「爽死」嘅咋！