乜誰先生（唔好意思，淨係知你係通街派報紙嗰個光頭佬啫）：
首先冒昧自我介紹，敝人六張幾，年紀大、手腳慢冇人請，加上讀得書少，只能靠執垃圾維生，係百分百「自僱人士」，但三餐基本無法「自顧」。雖然冇乜文化，但一向同爛果報好有淵源，無他嘅，爛果報執親都大大疊，簡直係收買佬至愛。
近排《爽報》獻世，真係多得你唔少。不過有樣嘢我諗極都唔明，其他免費報紙啲人行過多數會順手攞番份，邊行邊睇，或者放入袋等陣間睇。唯獨《爽報》好似染咗愛滋病毒咁，人人避之則吉，莫講話攞喇，見到都兜路行，就算攞咗嘅，望落滿眼鹽花，隨手塞入垃圾桶，幾分鐘就塞爆一個垃圾桶，我哋班行家睇見，不知幾鬼開心。
更開心就係，好多屋苑同學校都主動畀生意我哋做，要幫手收番晒啲冇人吼嘅《爽報》，而且「柯打」愈來愈多，幾乎收唔切，多謝晒。
不過，睇怕好景不長，家陣屋苑同學校都話要將呢份鹹報掃地出門，我哋隨時可能斷米路。仲有一樣惡頂嘅係，推住成車《爽報》去回收站，路上啲媽咪一見，即刻掩住阿仔對眼，話驚鹹過頭醃壞眼喎。
乜誰先生，喺度有個不求之請，橫掂免費《爽報》企街派都冇人睇咯，不如慳番派工錢，由我哋班垃圾佬直接入你間報館攞貨，保證印幾多收幾多，由工廠送去收買佬個倉，或者直接送去堆填區都得。冇錢收都冇所謂㗎，咪當義務支持環保囉。