政情：Eva鄭促學警慎言行
香港警察近年屢爆醜聞，除咗打壓遊行示威，以「黑影論」阻撓記者採訪，仲有亂將自己啲不雅照片上網，以及成日將報案人嘅資料透過電腦外洩等。就連同警隊冇乜關係嘅運輸及房屋局局長鄭汝樺（Eva、圖）亦睇唔過眼，借出席警察結業會操擔任檢閱官，教訓班新紮師兄師姐要小心一言一行，尤其係使用互聯網同智能手機嘅時候。其實警隊高層之前已經三申五令，叫啲手下自重同唔好亂咁擺嘢上網，啲前線警員依然當耳邊風，Eva以呢啲家長式嘅教仔口吻教訓學警，對方又點會聽你講呢？
籲防畀人擺上網
Eva喺結業會操上致詞表示，依家互聯網好發達，叫班學警小心一言一行，要覺得成日都有部Web Cam（互聯網攝影機）同手機影住自己。期間佢仲大拋書包，話二千幾年前萬世師表孔子已經話「君子慎其獨」，教班學警就算一個人嗰陣，都要維持好品格，咁先算係君子。
Eva又睇穿依家唔少學警，其實純粹係受警隊嘅高薪厚祿而報考，提醒佢哋無論抱咩心態嚟做警察，經過學堂教導後，就要有警察嘅抱負、目標同價值觀。佢自言成日會引《聖經》金句，等自己做事時做到法理情兼備，暗寸有啲警隊亂咁執法。