政情：葉劉高帽笠湯恩佳
尋日係萬世師表孔子誕辰，香港孔教學院為隆重其事，搞咗個慶祝大典，請咗疑似特首候選人行政會議召集人梁振英及立法會議員葉劉淑儀做嘉賓。唔知係咪近期特首選戰搞到大家好緊張，加上現場嘅中式布置，葉太致辭時竟然叫錯咗孔教學院院長湯恩佳做「孔院長」，隨即惹來哄堂大笑。好彩葉劉腦轉數夠快，即時以了得嘅口才「兜」得好好睇睇。
叫「孔院長」兜得快
葉太話，佢同湯恩佳相識多年，對於湯院長推動孔教儒學不遺餘力十分敬佩，故此喺佢心目中，湯院長猶如孔子再生，所以搞錯稱呼喎。葉太又舉出大學之道所倡：「在明明德，在親民」，就係新民黨嘅名稱由來，故此同孔教學院嘅理念相近，難怪佢當咗湯恩佳係孔子。唔知喺葉太心中嘅「孔夫子」湯恩佳，會否同葉太一齊研習聖賢書呢？