政情：煲呔曾橡皮圖章亂蓋印
對中央唯命是從嘅煲呔曾本身已經係個不折不扣嘅「橡皮圖章」，點知佢擔任名譽會長嘅旅港南海九江商會，就將圖章發揮得更加淋漓盡致。該商會擺烏龍，喺旗下創會百周年會慶特刊內，將煲呔曾個姓名印章亂咁加蓋喺兩個內地「芝麻」官員嘅簽名下。有睇完特刊嘅市民話，煲呔曾唔可以因同鄉情誼就側側膊唔處理，否則被不法分子亂蓋佢個印章招搖撞騙，咁就真係多得佢唔少喇。
該商會最近印製咗大約一千本創會百周年會慶特刊，當中有唔少名人嘅賀辭，部分特刊已經派咗出街。我哋睇過，特刊入面印有煲呔曾同前環境食物局局長任關佩英嘅題辭，煲呔曾嘅題辭係「百載駿業 惠港利鄉」，下款蓋有姓名印章。不過，最奇怪係內地佛山市南海區委常委冼富蘭及南海區外事僑務局局長林平武嘅題辭簽名下面，同樣都係印咗煲呔曾個印章，忽然「升呢」變咗高級官員。
唔少睇咗特刊嘅商會會員對印刷出錯都好唔滿意，批評特刊印製咁唔認真，將煲呔曾印章「張冠李戴」，直情係嚴重出錯，亦唔尊重班內地官員喎。大家都話件事嚴重影響商會聲譽，應該有人要問責咁話。亦有人覺得至少要刊登道歉啟事，否則任何人都可以隨便複製特首印章亂印，招搖撞騙就大件事喇。
主編輯指印刷廠出錯
商會常務會董兼特刊主編輯黃定一解釋，話成件事係印刷廠出錯，但佢自己都有責任嘅，會要求印刷商修正補救，而商會亦會全面收回已派出嘅特刊，而未派出嘅就另有安排咁話。
律師黃國桐話，未經同意將他人印章蓋喺其他文件上，屬偽造文件，最高可被判監十年，政府同執法部門應該正視問題。而印章屬個人財產，未經他人批准使用，屬盜用版權，印章持有人可以提出控訴㗎。特首辦就話，煲呔曾係接受邀請幫商會題辭及蓋印章，商會已經就印鑑誤植一事向特首辦道歉，特首辦會向商會跟進。但究竟會唔會報警查究就唔知喇。