中環出更：葛輝Starbucks打躉喪玩iPad
前政府資訊科技總監葛輝早前就「上網學習支援計劃」爆大鑊後，已經沉寂下來，鮮有喺公開場合露面，有傳話佢做緊自僱資訊科技顧問，接吓外間嘅散件工作，亦有人話佢趁機會抖番吓。卓妮前日下午茶時間路經中環歷山大廈，就見葛輝一支公坐喺Starbucks咖啡店，埋首專心玩iPad。
葛輝身穿間條恤衫、淺色西褲，望落精神好飽滿，仲心廣體胖咗，似乎一啲都無受到上網黑幕影響，加上佢回復自由身，心情自然靚。
卓妮見佢搵張枱坐低，咖啡都未買，就攞咗部iPad出嚟起勢咁篤，進入忘我境界。過咗冇幾耐，坐喺隔籬枱嘅一位男子，就攞起杯咖啡行過去同葛輝打招呼。
忽然封嘴 唔開fb
葛輝一見到有熟人，即刻笑到四萬咁口，仲企起身招呼呢位朋友坐低，隨即收起部iPad，然後同朋友慢慢傾。卓妮見到佢哋傾得咁開心，都唔好意思過去打擾佢哋喇。卓妮從朋友口中得知，葛輝個社交網站facebook戶口，好耐都冇使用過，最近一次留言都係七月嘅事，究竟佢點解忽然收晒口就不得而知喇。
卓妮