黑衣黑氈迎處長　港台果然無王管

話時話，廣播處長被人柴台，港府根本就係自取其辱。唔係咩？明明話全球招聘新處長㗎，點知遴選過程黑箱作業，唔清唔楚，大鑼大鼓搞咗大半年，最後又係搵番政務官空降，唔怪得授人以柄，被人攻擊喇。難得呢位鄧處長人如其名，被下屬玩到面目無光，一樣死忍爛忍，若無其事咁，工照返，官照做，真係服咗佢。

不過咁噃，鄧忍光故作鎮定，唔代表從此風平浪靜，佢第一日返工，下屬已經公然作反，又話抗議，又話罷工，仲話要港府收回任命添，睇嚟佢以後嘅日子都唔慌好過咯。嗱，如果話港台唔係無王管嘅獨立王國，你信唔信吖？

做人下屬嘅惡形惡相「兇」老細，唔好話私人機構冇可能見到，搵勻全世界，咁荒謬嘅事情睇怕只係香港獨有。嗱嗱嗱，連左派元老吳康民先生都睇唔過眼，發炮批評港台員工成何體統，頂頭上司啱啱履新之嘛，櫈都未坐落，就喊打喊殺，做法有欠公允。

其實，計功夫茶話齋，吳老所言甚是，但只係講中一半。港台一直以「編輯自主」做擋箭牌，閂埋門為所欲為，依家港府空降政務官實，佢哋仲唔發晒茅咩？於是咯喎，咪想先發制人玩殘鄧忍光，嚇窒港府，力拒外來監管，咁以後咪可以放心繼續做獨立王國囉。

講開又講，鄧忍光入主港台，工會形容係港台最黑暗一日喎，其實都幾有黑色幽默味道㗎，事關港台內部不嬲都咁黑暗㗎啦，簡直就係一個大黑箱。多年來，港台管理不善，帳目不清，濫用公帑，以權謀私，高層唔係色中餓鬼就係酒鬼，烏煙瘴氣，臭史一籮籮。

最離譜嘅係，港台作為政府部門，用公帑出糧，居然成日同港府唱對台戲，陰陽怪氣，立心不良，甚至同反中亂港傳媒狼狽為奸，做埋國際反華勢力嘅應聲蟲，唯恐天下不亂。港台中人對空降政務官感到憤怒，咁港台浪費公帑，污染大氣電波，市民嘅憤怒又應該向邊個清算？

總而言之，港台圍攻新老細，就係想繼續做獨立王國，港府唔可以一句「關人忍事」就撒手唔理，一定要徹底整治，除污去垢。再唔係嘅，索性將呢個陰陽怪氣嘅電台摺埋，一了百了，還港人耳根清淨都好吖！