區議會選舉提名期已展開，選舉管理委員會早前提出嘅《選舉活動指引》訂明，網上競選宣傳都要計算經費，如果唔理嘅話，到選後埋單計數，條數都幾襟計，選舉開支隨時爆煲，令好多參選人變成驚弓鳥，近日紛紛喺自己嘅社交網站facebook（fb）上「申報利益」，聲言會即時停用fb，而網頁上嘅一切轉載內容同佢無關，亦不會就留言作出任何回應。
已經停用fb嘅北區區議員劉國勳就批評，選管會此舉真係好白癡，，但佢話唔會因此就「斬腳趾避沙蟲」，因為fb係同街坊好好嘅溝通平台，所以會繼續保留fb，直到選舉之後重開。外號「星屑醫生」嘅選民力量成員歐陽英傑亦留言話，好似fb同網誌都係網上免費資源，零成本又點計選舉經費呢？最多咪申報上網費囉！
其實fb可以設定私隱權限，只要設定到戶口內容唔係開放予任何人睇到，就算向自己嘅朋友拉票，選管會都好難得知，所以參選人喺fb申報都係門面工夫，難怪呢個規範建議被網民狠批相當擾民同無聊。