做人千祈唔好講大話，因為遲早畀人踢爆。我哋先後寫過兩次，指勞工處助理處長陳圳德為咗搜集有關標準工時嘅黑材料，早前鬼祟帶隊去咗比利時同英國考察，點知話口未完，原來考察團已經轉飛南韓，下星期仲會去日本，爽呀。
記得當時我哋向相關人士了解過，話個日韓考察團未有具體日期、時間同人數，但原來個團喺文章見報當日，即今個星期三，已經出發去咗南韓。去完歐洲再遊日韓，做勞工處認真疏乎，不過去得咁鬼祟又點解釋呢？唔通公費考察都係政府機密，所以唔可以公開？
其實唔可以怪相關人士唔知道個團嘅資料，因為有人向我哋爆料，話勞工處嘅極高層人物已經下達指令，禁止員工向外透露呢個公帑考察團嘅詳情。爆料人仲話，呢種機密考察團到底有幾大實際作用，外界根本無從得知，加上極高層講到明限制員工言論自由，好難唔令人覺得係浪費公帑囉！