政情：任亮憲搞男權組織？

任亮憲今次被惡搞，話佢大搞「驕陽」組織幫風化案受屈嘅男士發聲，表面睇真嘅一樣，因為宣傳單張上唔只有相同黨徽，仲有唔少金句，句句都鏗鏘有力，似足任亮憲平時喺《城市論壇》發言，例如「女人幾滴眼淚，可令男人萬劫不復！」、「拒絕沉默、從受屈的陰霾中走出來！」

呢張單張網上瘋傳時，網民亦未知真偽，所以有網民就直斥任亮憲「仲有無廉恥㗎？」亦有網民話佢係「香港男權之父」。不過，有心水清網民話：「覺得佢係畀人玩」。人民力量尋晚發表聲明，話單張內容全屬作假，同人民力量或者任亮憲都無關係。好彩係假啫，否則任亮憲今鋪水洗都唔清，流走晒女性選民支持票。