政情：容永祺利用上帝挺唐？
疑似特首候選人政務司司長唐英年（唐唐）陣營嘅支持者近日陸續蒲頭，挺唐挺到出晒面，最出位嘅係專資會創會主席容永祺（Samuel），佢聲稱揀唐唐係受到上帝感召，點知呢番說話令外界議論紛紛，特別有基督團體質疑佢利用上帝，仲呼籲大家明日到Samuel去開嘅教會踩場，一齊領受感召喎。Samuel尋日重申唔會收回言論，仲話歡迎大家去教會聽道理喎。
林建岳與唐關係千絲萬縷
唐營尋日又多個支持者，就係麗新發展主席林建岳出來挺唐，佢話唐唐喺政府做咗好多年，一直都支持商界，所以必定支持唐唐參選。林建岳同唐唐相當老友，兩人都好鍾意飲紅酒，如果大家記得，唐唐曾喺○七年中被指乘坐林建岳嘅私人飛機到法國酒莊，被質疑接受富商款待有利益衝突，雖然唐唐當時透過發言人澄清，但從表面看來，兩人關係千絲萬縷，唔知今次有無景轟呢？
唐營內除咗一班支持者外，沉寂多時嘅唐媽媽唐尤淑圻都久休復出挺唐，佢出席一個酒會時，被問到會否擔心阿仔受到行政會議召集人梁振英（CY）威脅時，唐媽媽好有信心話：「公平競爭囉，大家睇吓邊個有料咪邊個勝出囉！」問佢唐唐係咪最好喺周一（十九日）辭職，唐媽媽又輕描淡寫話：「佢揸主意啦！」再問佢唐唐咁低民望有乜優勢時，唐媽媽就索性話：「我唔清楚。」
尋日酒會仲有港區人大代表王敏剛、費斐同袁武，佢哋未決定揀邊個。
一直被傳係CY支持者嘅立法會議員陳茂波，尋日就暗撐CY，話港人鍾意「迎難而上」，而專業界內嘅求變心強，想衝開目前困局。對於CY被勸退未必攞到足夠提名，陳茂波話：「我覺得（攞唔到）會好奇怪囉！」