政情：方文雄穩奪中總議席
區議會選舉已正式進入提名期，特首選舉亦步入埋身肉搏嘅階段，至於明年舉行嘅立法會選舉，部分功能界別議席更早就爭到頭崩額裂。其中選情一波幾折嘅商界（二），即代表中華總商會嘅議席，據聞最近已經有結果，由協成行董事總經理方文雄跑出，擊敗早前爆出被廉署請飲咖啡嘅「新金王」黃英豪，以及形象欠佳嘅「IQ博士」黃宜弘。
黃宜弘盤據中總立法會席位十多年，但表現同形象一向麻麻，經常飲醉去開會同瞓覺，提出質詢同動議次數又少，成為立會大懶蟲榜嘅常客，幾年前佢仲爆出向示威者展示粗口手勢嘅醜聞，畀人譏諷佢做「中指黃」，喺○四年同○八年立會換屆選舉，中總內部都曾有聲音要求換人。但由於前任中總會長霍震寰係一位大好人，唔想向呢位老前輩開刀，佢先可以做到依家。
不過，隨着新任會長蔡冠深上場，銳意將中總呢間「百年老店」現代化同年輕化，新一批領導層早前已有共識要踢走黃宜弘，接班人選包括常務會董黃英豪及副會長方文雄，並一度盛傳已由從政經驗較長嘅黃英豪跑出。點知好景不常，黃英豪旗下公司早前發生事故，佢本人更加被廉政公署請飲咖啡協助調查，令佢嘅行情由熱變冷。
與此同時，之前已打定輸數棄選收山嘅黃宜弘，喺黃英豪「出事」後突然轉趨積極，主動向中總中人大談自己仍好有活力，早前又罕有同傳媒遊船河，最近仲加入埋由多個親商政團組成嘅工商專業聯盟，疑似想敗部復活，再玩一屆。不過，據聞蔡冠深等一眾新領導層嘅換班決心非常堅決，最近已達成共識，推舉方文雄接棒。
處身立會或較蝕底
方文雄為福布斯富豪、本港大慈善家方潤華嘅愛子，已逐步接手打理家族生意，並且一直有心從政，去年就成立咗個智庫「香江聚賢」為香港出謀獻策。有中總核心就盛讚方文雄年輕有為，人緣又好，做人、做生意同做會務都冇得彈，又深得蔡冠深支持，唯獨係佢為人略嫌太過順得人，口才亦只屬一般，要佢喺立法會同班反對派開戰互罵，可能比較蝕底，寄望佢盡快趁嚟緊一年練好把口，表現得再硬淨啲，以便將來為中總及工商界發聲。