中環出更：麥玲玲北上搵人仔
港人到內地做生意係將來嘅大趨勢，就連風水呢行嘅需求都愈來愈大。卓妮早幾日下午喺中環皇后大道中萬年大廈對面，見到一身套裝、素顏嘅堪輿學家麥玲玲企喺路邊等車，邊等車邊講電話，好似好忙咁。
卓妮上前同玲玲打聲招呼，問佢一陣去邊，平易近人嘅佢笑笑口話，一陣要返公司做嘢，晏啲仲要返內地睇風水，總之就忙到有氣冇碇抖咁話。睇嚟玲玲喺內地風水界嘅人氣愈來愈勁喎，賺人仔賺到笑啦！
話風水師要有慧根
問玲玲做風水師要有啲乜嘢條件，佢話最緊要本身有慧根，對風水術數有良好嘅領悟力，當然，仲要對風水呢一行有濃厚興趣啦。不過，玲玲可能講少咗一樣嘢，就係運勢，如果冇運都幾難喺業界內闖出名堂，大家話係咪呢？