中環出更：錢果豐逛超市 掃東瀛美食
中環ifc嘅city'super有唔少名人鍾意喺度選購美食，好似九巴新抱雷林靜怡，仲有港鐵主席錢果豐（Raymond）都係該店嘅擁躉，事關卓妮先後兩次撞過Raymond，佢對日式食品情有獨鍾，無論係日本乾濕貨或熟食，統統都逃唔出佢嘅手指罅。
上月初，卓妮曾經見到Raymond一個人趁住該店減價優惠，入去掃咗好多心水貨品，包括日本蕎麥麵、日式醬油、以色列無花果及牛扒等，雖然行咗好耐，但滿載而歸。
環保唔用膠袋
卓妮尋日下午又行過city'super，竟然又遇到西裝骨骨嘅Raymond出現，但今次見佢冇咁悠閒可以推住架車仔慢慢揀，反而快步走到熟食部，匆匆買咗盒日式炸物，連膠袋都冇用，夠晒環保。
卓妮見Raymond攞住盒炸物快步離開，然後沿天橋行向舊中環街市方向。唔知佢咁趕，係咪趕返公司度下點樣改善港鐵服務呢？
卓妮