港式官僚保護政要不知幾神勇，一見風吹草動即刻施展分筋錯骨擒拿手，好一個「六四Ｔ恤男」馬上被消失於政要視線範圍以外。萬一有疑似黑影嘅記者拍攝採訪，勁咯，警務人員會施展捕風捉影卡住手，以免抬人畫面污染政要眼球。
既然係咁，照道理官老爺保護一草一木一土一地都應該好神勇㗎，點解會出現西貢大浪西灣淪為建築地盤嘅不尋常事件呢？點解申訴專員公署又會批評規劃署保護不力？或者咁講啦，土地雖然珍貴，不過始終唔係天威難測政要，保護不力唔等於擦鞋不力吖嘛，港式官僚咪懶得就懶囉。
如果大家唔明功夫茶講緊乜，咁就要介紹一下申訴專員公署嘅調查結果。公署話呀，政府打從一九九一年開始，已經打算以制訂規劃圖則方式，保護全港七十七幅毗鄰郊野公園土地，但延至二十年後嘅今時今日，規劃署僅僅為其中一半土地制訂圖則。七十七幅土地之中有十二幅必須優先保護，可惜吖，進度非常緩慢，簡直慢過蝸牛上樹。二○○一至二○一○年期間，甚至出現十年只為一幅土地制圖嘅超級無敵慢動作。
申訴專員公署不但批評規劃署以人手不足作為解釋係不可接受，同時又不滿環境局以及發展局監督不足。總而言之，好似被譽為「十大美景之首」嘅大浪西灣等等珍貴土地，冇受到官方應有嘅保護。
好嘞，你估發生大浪西灣事件之後，本地官老爺點樣喺輿論壓力之下補鑊吖嗱？講出嚟嚇你一驚，規劃署竟然可以花費短短兩個月時間，火速完成大浪西灣制圖。
唉，呢家嘢好明顯就係懶到出汁嘅極品表現，明明兩個月工夫就可以保護一幅土地，規劃署偏偏有本事拖足十年。如果要喺一眾政府部門之中投票選一個懶王之王，規劃署肯定係頂頭大熱。
如果話環境局監督不足，全香港睇怕冇乜邊個會反對。喂，記唔記得擴展將軍澳堆填區事件呀？環境局局長邱騰華居然夠膽死打郊野公園主意，企圖將五公頃土地納入堆填區。好彩群眾發揮力量咋，大聲疾呼之下驚動立法會，先至透過議員將侵佔郊野公園嘅陰謀一嘢扑低。所以話啫，環境局保護土地失職完全係實至名歸。
計功夫茶話齋，好心港式官僚唔好咁心理不平衡啦，保護政要使乜咁大陣仗嘅，保護土地就切戒玩忽職守。如果兩方面平衡一下，你話世界幾美好呢？最低限度咯喎，堅持「黑影論」嘅警隊一哥禿鷹先生冇必要淪為笑柄吖嘛！