夕陽政府冇乜建樹，最叻浪費納稅人金錢。煲呔曾早前先去完比利時，依家仲喺佢嘅舊宗主國流連忘返。立法會今日討論新交通津貼計劃，但相關官員好似勞工及福利局局長張建宗及運輸及房屋局局長鄭汝樺，就去咗美國三藩市出席亞太區經濟合作組織會議。政府尋日再一口氣公布四名局長嘅外訪計劃，加埋先後七位主要官員離港，令港府管治出現真空。
環境局局長邱騰華尋日出發去瑞典馬爾默，之後會去丹麥哥本哈根同挪威朗厄松，理由係交流兩地嘅環保政策，以及向三國推廣本港嘅地質公園。其實邱騰華一年前先去過哥本哈根開聯合國氣候會議，頂替「氣候逃犯」煲呔曾，依家又嘥公帑去多次，係咪有需要呢？
食物及衞生局局長周一嶽尋晚起程往美國，首先會去三藩市同張建宗及Eva鄭會合出席亞太經合會議，就預防同控制非傳染病發表演說，之後轉飛紐約同亞特蘭大，出席聯合國防控非傳染病高層會議同參觀美國疾病控制及預防中心，東西岸一次過去晒，認真過癮。
煲呔曾下周返港冇耐，又輪到政制及內地事務局局長林瑞麟同商務及經濟發展局局長蘇錦樑一齊離港，到江西南昌出席第七屆泛珠三角區域合作論壇。咁多高官外訪，政府想唔管治真空都幾難。