政情：學者揭重慶大廈面紗
尖沙咀重慶大廈一直畀人感覺亂糟糟，但中大人類學系教授麥高登對重慶大廈情有獨鍾，為咗揭開獨一無二嘅重慶大廈神秘面紗，據聞麥教授花咗唔少時間同大廈入面嘅朋友建立互信，最近仲結集四年嘅親身體驗，寫成名為《世界中心的貧民區︰香港的重慶大廈》一書，計劃喺下周三同大家分享自己嘅體會。
麥教授嘅來頭都唔細，本身係喺美國康乃爾大學接受教育嘅人類學者，佢為咗研究重慶大廈，真係全程投入，佢曾經跟一名喺大廈內認識嘅朋友返到佢喺印度嘅家鄉，發現呢位喺香港工作時被剝削嘅朋友，回到家鄉後卻受到眾人羨慕。麥教授話，港人遇到喺大廈生活嘅人，表面係對彼此毫冇認識，但其實佢哋好相似，都渴望成為中產階層。
話時話，麥教授嘅見解精闢獨到，難怪《華爾街日報》有書評大讚本書雖然係學術著作，但讀起來似商業書籍多啲，有興趣嘅書迷就要密切留意麥教授嘅著作喇！