政情：徐立之早知保安安排？
對於國務院副總理李克強出席港大百周年慶典嘅保安安排，港大校長徐立之一直話事先參與唔多，企圖藉此脫身。不過尋日就有人爆料，話校方同警方就保安安排召開嘅最後一次會議，即警方要求大幅擴大校內保安區嘅會議，徐立之亦曾經現身，並漏夜同一眾校方及警方高層巡視太古橋等核心保安區，顯示佢並非唔知情。
校方指「路過」太古橋
不過，港大方面就否認徐立之有份參與該次會議同到太古橋視察，聲稱校長當晚只係咁啱「路過」太古橋，為咁夜仲喺度做嘢嘅同事打打氣，以及與在場嘅警員握吓手打招呼，停留咗幾分鐘就離開，所以徐立之真係唔知具體嘅保安安排喎！
同樣為大學校長嘅城大校長郭位，尋日出席一個酒會時被問及港大保安風波，佢自言身為其他大學嘅校長，唔方便評論人哋學校嘅事，但亦認為雙方都應該檢討事件。佢又笑言依家新高中同大學都有通識教育，可以將呢個課題擺入通識課，畀徐立之聽到實激到紮紮跳。至於徐立之本人，尋日佢出席港大百周年紀念郵票發行禮，全程掛住同班出席儀式嘅小學生同嘉賓傾談，對記者所有提問都扮聽唔到。