政情:陳永棋CY隔空過招

特首戰轉入大直路,疑似特首候選人唐英年支持者連日來出口術,欲勸退另一疑似特首候選人梁振英(CY),CY尋日終於來個大反擊,除咗強調自己唔會被勸退外,仲話特首選舉有競爭先至有認受性。不過,挺唐嘅全國政協常委陳永棋隨即反駁,話特首選舉一定有競爭,只不過係唐營同民主黨之間嘅競爭喎!

唐唐同CY尋日分別喺博鰲青年論壇及工商界十.一酒會上碰頭,但唐唐兩次都冇回答記者問題,但喺發言時就多次擦青年人鞋,話年輕人有理想、有衝勁、有創意,似乎為早前嘅「車毀人亡」言論補飛。雖然唐唐同CY喺兩個場合都冇乜交流,只係喺工商界酒會上碰過杯,但CY就先後兩次見記者作高調反擊。

梁振英拒讓路誓落場

CY話,想參選特首嘅決心未動搖過,因為香港未來幾年要面對好多問題,如果冇一個有認受性嘅特首,日後施政會好唔方便,所以佢會迎難而上,況且至今未有人勸退佢,就算有人勸退佢,佢都話唔會退喎。CY又話,負責選特首嘅一千二百個選委都未選出,所以呢場選舉唔會咁快有結論,意思即係仲有得爭。

既然CY誓要落場,唐營有乜反應呢?一直硬撐唐唐嘅陳永棋就叫大家放心,佢話特首選舉一定有競爭,不過同唐唐爭嗰個係民主黨主席何俊仁(鐵頭仁)囉,而CY個名,棋哥連提都無提,擺明當佢無到。棋哥擺鐵頭仁上枱,無非都係想話除咗唐唐之外就唔可以有另一個建制派人士參選,藉此再一次勸退CY,無謂垂死掙扎。

不過,尋日同場有唔少政商界人士都未表態撐邊個,好似工業家蔣震就話兩個都好好,邊個做都會接受。行會成員梁智鴻亦贊成有競爭先至有進步,話兩個建制派入閘都冇有怕喎。中華總商會會長蔡冠深就顯得好迷茫,明明手持緊一杯橙汁,但被記者圍攻發問下竟然話想「飲杯水先」,可能佢都未搞清楚支持邊個。

有資深建制派人士分析,話如果中央唔干預特首戰,一千二百張選委票中,泛民應該攞到二百票左右,而剩低嘅票源,唐唐攞到六成五,CY得三成五。由於CY深得一批勞工界同專業界選委支持,所以選委內都有聲音想CY同唐唐拗吓手瓜先,一來可以免除中央出手干預,二來亦可為二○一七普選起示範作用。

范太隔岸觀火好安樂

由想參選轉為支持唐唐嘅全國人大常委范徐麗泰,尋晚喺政府人員協會周年晚會上致詞時主動話:「我企喺度好安樂,因為我唔使參選呀!」令在場嘅人士笑不攏嘴。

「Money18免費即秒股票報價網站」現推出8升級功能,財經資訊,實時實發!