中環出更：菁英捱通頂搞好博鰲大騷
2011博鰲青年論壇尋日開鑼，來自亞太區政要及商界領袖，朝早九點鐘齊集會展。唔少菁英會兄弟姊妹通宵達旦籌備大騷，只瞓得三、四個小時，為對抗睡魔，各人法寶盡出，有人沖冰水浴，有人狂滴超勁薄荷眼藥水，避免論壇期間「釣魚」瞌眼瞓失禮人。
洪為民沖冰水浴提神
菁英會搞大騷，近百位菁英會成員空群出動，富二代會員都放低身段，幫手做「保安」同「迎賓」。
主席洪為民話，前晚只瞓得三個幾小時，為除倦意，朝早六點起身後，沖咗兩轉冰水浴，當堂醒晒！莊士集團太子爺莊家彬（Albert）前晚都緊張到扎醒兩次，醒來眼乾又澀，惟有狂滴購自日本嘅超強薄荷眼藥水，令佢對眼睛明亮晒！
立法會議員梁君彥公子梁宏正擔任論壇總指揮，見佢馬不停蹄打點，緊張過自己結婚，佢話多得兄弟夠踴躍，義工人數較往年多。不過，講到印製場刊，就因為撞正中秋佳節，一度無工廠肯承印，幸好菁英會司庫鄭重科喺深圳開印刷廠，漏夜趕起兩千本場刊，有驚無險。
論壇咁成功，創會主席施榮忻、榮譽主席白富鴻、常務副主席楊華勇及副主席霍啟剛都話飲得杯落。今年論壇主打青年問題，導演高志森即場分享創意文化，佢一針見血批評政府只重視尖子藝術家，對年輕藝人缺乏支援同鼓勵。佢又慨嘆港產片已成絕唱，現階段只能拍具港產片特色嘅中國電影喎。
卓妮