政情：羅棣萱關注獨居長者
夕陽政府經常開口埋口推動家庭友善政策，但獨居長者好少被關注，形同社會被遺棄嘅一群。正積極考慮喺沙田馬鞍山利安選區參選嘅沙田婦女會利安服務中心主任羅棣萱（Ada），一直關注獨居長者嘅權益，過去嘅工作亦有口皆碑，曾經有件突發事件令佢感受至深。
話說有一次有位獨居婆婆喺家中不適，指明要見到Ada先至願意入院接受治療，直情當正Ada係佢親生女兒，此事令Ada留下好深刻嘅感覺。Ada事後話，獨居婆婆嘅信任令佢體會到，雖然地區工作係全天候二十四小時，但只要幫到人就一啲累意都冇喎。
Ada除咗係註冊社工外，仲係新界青年聯會委員，地區工作絕對難唔到佢，事關佢做事一向秉持「細心聆聽，用眼看，用腦想，嘴巴講」嘅精神，成為各方溝通並解決問題嘅重要橋樑，佢承諾今後都會繼續以同樣精神服務地區。