政情：許漢忠70萬公款換車
機場管理局行政總裁許漢忠近日為興建新跑道計劃搞到氹氹轉，一波未平，一波又起，被人質疑佢用公款買靚車自用，仲要係先斬後奏。不過，機管局公關隨即解釋，話機管局一直有提供車輛畀CEO使用，而CEO部舊凌志房車已經用咗八年，行駛路程超過廿六萬公里，又大修過好多次，繼續維修唔多划算，所以經主席批准後決定換新車，採購程序符合規定喎。
機管局發言人透露，許漢忠揀咗部奧迪（Audi）A6 3.0 TFSI quattro四門房車做座駕，又強調CEO買車金額並無上限，但為咗慳錢，已經特登揀咗部2010年款，車價約七十萬元，仲平過舊嗰部凌志幾萬元。佢部新車款式及價錢，同依家司局長及立法會主席使用緊嘅座駕不相伯仲，身為一個機構嘅CEO，點都要有番部咁上下嘅靚車先至出得大場面嘅。