政情：博愛扶老歎鮑參翅肚
通脹高企，萬物騰貴，低收入長者想食餐好嘅，真係愈嚟愈難，好在有行善積福嘅人幫手。博愛醫院日前就請咗約五十位來自元朗、天水圍嘅長者，到銅鑼灣米芝蓮星級食肆農圃飯店，歎飯店特別炮製嘅的骰鮑參翅肚宴，又送贈內有月餅、福米嘅福袋，加上博愛主席湯修齊獻唱助興，氹到長者們不知幾開心。
博愛醫院今年初推出「長者夢想成真計劃」，為六十五歲以上長期病患或獨居長者達成心願，今次出席嘅長者願望係「想食餐好嘅」。博愛第一副主席潘德明話，佢同農圃飯店老闆鄧細安係多年老友，早前兩人傾開時一拍即合，由鄧細安免費請客，每位長者免費享用價值六百元嘅盛宴，包括鮑魚、海參、花膠及蛋白燴翅，大家都喺中秋前夕夢想成真！