政情：鬍鬚曾賣剩蔗冇人吼

CS人選 各有隱憂

其實喺特首選戰醞釀初期，已有人擔心唐唐辭職後由邊個接手CS呢個位，據聞最多人提議嘅係孫公，皆因佢喺政府做咗四十幾年，做過唔同政府部門，回歸前又做過政務司，資歷上絕對夠班。加上佢應該唔會戀棧權位爭上位，之後冇手尾跟，所以係唔錯嘅人選。早前被踢爆腎功能衰退，大家擔心佢捱唔捱到餘下任期之際，佢就堅稱頂得順，令人揣測佢要為接手CS個位。

除咗孫公，幾個局長都係夕陽政府考慮之列。被稱「好打得」局長嘅林鄭，本來都係幾好嘅人選，但CS嘅角色都好考協調能力，而林鄭嘅人緣麻麻，好似僭建問題上都同啲鄉紳、市民有晒牙齒印，只怕畀佢頂上會出事。至於林D9本來都係大熱之選，但係一個替補機制搞到全港市民共憤，民望插水。亦都有人提議由運輸及房屋局局長鄭汝樺頂上，但佢資歷比較淺，怕唔夠穩陣喎。

大家講來講去，始終冇人提過搵鬍鬚曾做CS。其實由財政司司長接替政務司司長個位都唔係冇譜，事關煲呔曾同唐唐以前都係由財爺進身CS，而鬍鬚曾一向都好有野心，想喺官場更上一層樓，甚至大想頭到要做特首添。不過，佢做財爺以來冇乜建樹，今年初搞咗個被喻為「史上最廢」嘅財政預算案，學人派錢都派到畀人鬧，所以大家都對佢零期望，難怪夕陽政府都唔敢搵佢頂上，費事收尾嗰年再衰多幾鑊。