中環出更：鄭明明買工廈擺衫都勁賺
「美容教主」鄭明明投資物業眼光準繩，買豪宅無往而不利，原來佢投資工廈單位都一樣咁叻。明明姐日前接受電視台訪問時透露，原來佢廿年前已睇準工廈呎租平，於是花八十萬元購入一個逾二千呎單位，用來做「衣物倉」，擺放靚衫靚鞋。
明明姐持貨十多年之後，至今單位升值至三百萬元，勁賺二百幾萬，投資回報絕不遜於住宅單位。
謝寧「整餅」壓力大
不過，靚衫愈買愈多，二千呎貨倉都唔夠用，明明姐於是喺五年前將單位出售，再斥資逾四百萬元購入荃灣一個五千呎嘅工廈單位，如今升值唔少，加上地方寬敞，放幾萬件靚衫都得。有大貨倉擺靚衫，明明姐就好細心將靚衫及靚鞋逐一影相，編好號碼，當想着邊件衫時，就吩咐傭人去攞，方便到極。
同場仲有前港姐兼餅店老闆娘謝寧，佢嘅賺錢秘笈就係開餅店。
但謝寧大呻近年舖位租金及食材成本狂加，壓力好大，希望盡快賺夠錢買地舖，唔使再受加租之苦喎。