中環出更：高永文帶隊食勻潮汕三市
骨科名醫高永文出名「潮」，身為潮州冷，亦係潮州商會常務會董，對潮州美食瘋狂熱愛，為訪尋正宗潮菜，高醫生就組成「為食兵團」，八月中帶隊訪潮汕三市，同行仲有潮州商會青委會副主任胡炎松等，一行近十人，為年底舉辦嘅潮州美食節做先頭部隊，搜尋「潮食」。
潮州美食多籮籮，為食兵團今趟試勻當地著名嘅滷水鵝肝、鵝肉、手打牛丸、彈牙魚蛋等，一日食足五餐。今次旅程嘅重點節目係參觀薄殼養殖場，一行人去到汕頭達豪，該處屬鹹淡水交界，養殖出來嘅薄殼，分外肥美。
嘗滷水鵝炒薄殼
薄殼係潮汕招牌美食，殼身比指甲仲要薄，但肉質鮮嫩。由於薄殼「脆弱」，只能派潛水員落水逐少逐少撈起，可謂粒粒皆辛苦。
新鮮撈起嘅薄殼，團友急不及待攞去酒家煮來吃。高醫生發現，薄殼原來有好多種煮法，好似一碟金不換炒薄殼，足以令佢食幾碗白飯，清清哋拌米粉一起煮，一樣惹味。
潮州獅頭鵝好著名，用來製成滷水鵝特別美味，傳說有老鵝重達七十斤，鵝肉香濃。不過，團友今次就搵唔到巨鵝喇，最重嘅約有三十斤，團友當然唔會錯過品嘗新鮮滷水鵝及鵝肝，高醫生笑言怕膽固醇高，食鵝肝也只是一塊起，兩塊止。
參觀完鵝場，眾人又直踩澄海嘅肉丸工場，當地手打魚蛋及牛丸好馳名，高醫生把握機會狂掃數十斤牛丸，帶返香港做手信。
卓妮