淫賤黎旗下壹淫媒雖然冇乜公信力，爛果報經常造謠生事已經婦孺皆知，之但係咁，閣下一旦成為攻擊對象，仍然係相當煩嘅一件事。就好似烏蠅咁吖，冇錯係微不足道，不過只要有一隻烏蠅繞住你個頭飛來飛去，始終令你煩到嘔。
更加令人煩厭嘅係，爛果報係一隻專門纏擾富商李嘉誠同長實集團嘅烏蠅，其中一個攻擊對象係長實地產投資董事郭子威。點樣攻擊法呢？咁就要睇番政府舊年出招遏抑樓市嘅「額外印花稅」。
舊年十一月十九日，財政司司長曾俊華忽然宣布推出一系列徵收額外印花稅措施，兩年內轉售即按成交樓價抽稅，另外又收緊銀行按揭成數，藉此加重炒家負擔。
當時有記者即場提問，十一月二十日之前簽訂臨時買賣合約，會唔會受到新措施影響呀？鬍鬚曾嘅答案係「明天起才計算」。好嘞，咁即係話，只要十一月二十日之前簽咗臨時買賣合約，之後再簽正式買賣合約都冇問題啦。
正常地球人都係咁諗，包括長實地產投資董事郭子威，佢喺微博發放訊息講明「今天（十一月十九日）買盛薈絕對不受新的政府措施影響」。問題係，爛果報唔正常吖嘛，甚至有可能唔係地球人，佢哋生安白造老屈郭子威誤導買家。
好衰唔衰，堂堂特區政府嘅智商居然唔高得過一隻烏蠅，運輸及房屋局聯同地政總署多位高官都認為郭子威言論不恰當，再加上立法會議員李永達之流乘機抽水，推波助瀾之下事件愈鬧愈大。
唔理點都好，最核心嘅關鍵係郭子威是否誤導買家？答案有嘞，稅局白紙黑字寫到明，等功夫茶一字不漏抄一次——
就「額外印花稅」而言，臨時買賣合約是一份「可予徵收印花稅的買賣協議」。當買方在二○一○年十一月二十日前已訂立臨時買賣合約購入住宅物業，他會被視為在二○一○年十一月二十日前已取得有關物業，即使他在取得物業後二十四個月或以內將物業轉售，也毋須繳納「額外印花稅」。
呢嗱嗱嗱，真相大白，水落石出，爛果報徹頭徹尾就係砌人生豬肉，郭子威食咗一隻死貓。至於點解要夾硬老屈郭子威呢？咪又係爛果報一以貫之嘅陰招囉，長實主席李嘉誠睇唔起淫賤黎誨淫誨盜，唔會喺壹淫媒落廣告，於是淫賤黎就變相勒索，不斷生安白造發動煩過烏蠅嘅無聊攻擊，目的係逼誠哥落廣告。於是乎咯喎，長實要員郭子威就遭殃嘞。
爛果報固然無恥，弊在政府都同佢哋一齊癲癲喪喪，簡直就係「官奸勾結」！