立法會搬到添馬艦後，十月第一個禮拜二正式「復會」，而且一開波就馬不停蹄，一日內開足幾個會，包括大會、法案委員會、財委會，連人事編制同工務小組委員會都要逼埋同一日開會，究竟搞咩要開快車呢？睇真啲，原來乜都係假嘅，只係為咗測試開會流程，試下投票會唔會蝦碌。不過如果唔安排「長毛」梁國雄等人掟吓嘢，都好難試到保安呢一環喎。
今次測試嘅模擬立法會跟足程序，好似大會搭正十一點先開始，有兩條質詢，之後到議員議案，晏晝仲有放飯時間，同平時一模一樣。下晝兩點半就開始財委會同內會，分別傾沙中線撥款以及同政務司司長會面事宜，內容似層層，但全部都係「假」會議，目的只為測試計時器、投票掣有無駁錯等。
乜都試勻，有一樣嘢無打算測試，就係保安企位嘞。日後官員萬一又講廢話，長毛同黃毓民隨時掟嘢招呼佢哋，咁保安應該邊個位撲出嚟救駕呢？睇嚟立法會對保安好有信心，先至唔使預演一次。