政情：建制派部署爭法律界選委
負責選出下屆特首嘅一千二百名選委將於今年年底產生，○六年泛民主派橫掃多個專業界別選委席位，當中法律界廿席全部由泛民囊括，建制派則全軍覆沒，事隔五年，泛民當然雄心壯志想再次「橫掃千軍」，但基於民主黨與公民黨尚未就共推特首候選人取得共識，至今尚未積極動員泛民中人部署參選選委，相反建制派已經密密做嘢，密謀搶攻多個泛民嘅「橋頭堡」。
據聞建制派吸取上屆喺法律界捧蛋嘅經驗，初步計劃派出至少兩張名單參選，一來左右包抄泛民名單，二來其中一張名單可派遣親中色彩較少嘅法律界中人參選，爭取業界游離票嘅支持，究竟呢一招會否為建制陣營喺法律界取得零的突破，大家就要拭目以待嘞。
至於立法會法律界議席，之前有傳泛民有意支持曾做過立法會法律顧問嘅王桂壎（阿壎）參選，但據聞公民黨擔心幫阿壎上轎後，變相將法律界個位拱手相讓畀建制派，所以密謀再次派人霸佔法律界議席。