政情：林煥光寧願教書都唔做官
有啲嘢後知後覺，總比唔知唔覺好。喺官場打滾三十幾年，最終因婚外情而辭職嘅林煥光，依家做咗平機會主席，尋日佢接受電台節目訪問時自爆，話諗番轉頭，發覺自己去教書可能仲好過做官。佢話自己一向唔係好識講嘢，所以當年做官最辛苦係應付一眾傳媒，反而近呢幾年去大學教書講道理，就最有滿足感。
自言興趣係讀書嘅林煥光話，近年愛上教書，又話每次備課時，都覺得好興奮好好玩，因為可以從自己已知嘅知識中抽取精華嚟教書，絕對有種溫故知新感覺。估唔到林煥光為官多年，一直都覺得做官咁無癮。
佢又提到，自己喺政府第一份工，就係喺理民府處理清拆寮屋問題，佢話當年村民被拆屋都好激動，但只要企喺佢哋嗰邊諗，就會理解佢哋點解咁嬲。佢話做官唔一定要搞到黑白、敵我分明，有時要畀市民有好處，先係化解官民矛盾嘅最好方法。即係以民為本喇，講就容易，知易行難呀。