政情：勞工處鬼祟赴歐攞料
煲呔曾好快就會執包袱走人，但佢似乎忘記咗去年喺施政報告大大聲話開綠燈研究標準工時，仲話長遠會立法添！不過，講到咁大原來只係大隻講，事關勞工界至今未見勞工及福利局局長張建宗同勞工處處長卓永興做過啲乜嘢，一味採取拖字訣，仲踢爆張建宗靜雞雞喺七月中派咗個勞工處助理處長去歐洲考察當地嘅標準工時實施情況，以便煲呔曾喺下月發表施政報告時敷衍大家。
勞工處七月去歐洲考察標準工時，莫講話勞工界蒙在鼓裏，就連立法會議員都話無聽過。據聞暑假期間有人見到勞工處助理處長陳圳德一行人搭飛機去布魯塞爾，相信係去公幹。勞工界打聽之下先知道原來係勞工處派人去咗布魯塞爾同倫敦，先去布魯塞爾歐盟總部了解吓歐盟推行標準工時嘅工作，隨後再去倫敦考察。不過，勞工處到依家都未有交代過，只係話標準工時仲係研究階段喎。
整色整水 敷衍打工仔
記得立法會人力事務委員會都喺七月拉大隊去南韓考察標準工時，但勞工處就冇派人跟埋去睇吓，反而鬼鬼祟祟拉隊去考察歐洲。至於點解當局要去歐洲取經呢？歐洲普遍國家嘅標準工時較亞洲為低，好多實施制度後都帶來深遠影響，莫非政府想用呢啲數據來拖延立法？究竟有乜蠱惑真係政府先至知道。
勞工界中人話，勞福局過去已經一味採取拖字訣，一時話制訂標準工時複雜，一時又話社會未有共識，擺明就係唔想搞。不過，話晒呢項都係施政報告嘅承諾，煲呔曾下月就會發表最後一份施政報告，張建宗同卓永興點都要整啲嘢出嚟畀煲呔曾敷衍勞工界及打工仔。
單係睇勞福局同勞工處嘅所作所為，好難怪勞工界睇死夕陽政府毫無誠意定立標準工時，好無奈話最低工資都爭取咗幾十年先至逼到政府立法，標準工時又有乜可能喺一、兩年內搞掂吖，睇怕勞工處同立法會七月兩趟海外考察，都係嘥錢居多喇！