中環出更：張雅麗打動郎朗辦學
靚太唔易做，好似香港菁英會副司庫張雅麗（Carol）就拒做少奶奶，早前成功打動著名鋼琴家郎朗，合作喺深圳開設首間音樂學校，進軍做「教育女王」。
Carol近年積極做公職，除咗活躍於菁英會，仲出任港島各界聯合會副理事長，前晚喺會展就職，佢開心分享成功之道。咪睇Carol嬌滴滴，其實佢係劍橋大學經濟系高材生，畢業後曾任職高盛投資，九年前加入英孚教育集團，幫手喺香港及內地開設逾百間英語培訓學校。
一次機緣下，Carol認識咗郎朗，靈機一觸提出合作開音樂學校。郎朗出名要求高，但佢誠意十足，終打動對方。佔地逾三萬呎嘅郎朗音樂世界學校，明年初就會開幕，聽聞已有唔少學生敲門報名添。
李鋈麟英雄救美
前晚就職禮冠蓋雲集，期間發生一段小插曲，話說有位中年女士上台就職時差錯腳，仲差啲跌落台，好彩在場嘅東華總理李鋈麟，同擔任博愛總理嘅細佬李鋈發即上前慰問，身為醫療輔助隊高五級長官嘅李鋈麟，仲幫傷者檢查傷勢。李鋈麟自己都係「病人」，右腳做完十字韌帶手術後不時隱隱作痛，此番英雄救美認真唔話得。
卓妮