西九文化區講咗Ｎ咁多年，依家仲係爛地一笪，乜嘢藝術殿堂、文化盛事，全部未見影，反而轉換管理層就好似走馬燈一樣，睇到市民眼花繚亂。呢，新任行政總裁連納智尋日首次喺立法會粉墨登場，大家不如聽吓呢位洋和尚唸乜嘢經吖。
哦，原來連納智向議員講解西九進度。佢話喎，西九團隊正進行多項工作，包括開展第三階段公眾諮詢，又全力擬備發展圖則，最快於年底提交城規會審批。吓！唔係呀？西九曬咗十幾年草皮，依家仲係講緊搞公眾諮詢、草擬圖則，咁豈不是仲係得個噏字？講到進展咯喎，唔係冇嘅，不過慢過龜爬囉。
嗱，西九進度牛步蝸行，但係通脹就唔等人，好似火箭咁急升。連納智不得不發預警，指立法會○八年通過撥款二百一十六億元畀西九管理局，但呢幾年工程造價上升咗六成，加上爆發金融海嘯，投資回報達唔到當初估計嘅每年百分之六點零八，對工程成本構成重大壓力喎。講白啲，即係呻窮，博港府再揼水。
話時話，通脹如狼似虎，工程成本不斷上漲，呢啲因素都無法控制，但係西九撥款三年前已通過，依家工程仍然十畫未有一撇，如果繼續以呢個蟻躝速度前進，三年復三年，到最後完工嗰陣，容乜易要千億埋單㗎？咁搞法，港府唔係打造文化殿堂，係揼錢落海就真！
所以話啫，呢個政府有時真係好鬼荒謬。曾蔭權為咗一己面子，一聲令下，添馬艦新政府總部日夜趕工，極速落成，最終鬧出豆腐渣工程醜聞。之但係西九呢，蹉跎十幾年歲月，港府仲係一味拖拖拉拉，整個項目至今仍然只得空中樓閣，乜嘢以民為本、福為民開，吹水唔抹嘴，仲慘過大笪地嘅講古佬。
話時話吖，議而不決，決而不行，基建拖拉緩慢，早就成為港產官僚嘅施政特色。西九係十年南柯夢，港珠澳大橋更加廿年崎嶇路難行，本來都準備動工㗎啦，臨門一腳都畀人以司法覆核煞停，搞到騎虎難下，唔知幾時先至完工。香港再咁落去，遲早被周邊城市趕上，到時就算有西九舞台，都無戲唱咯。
最搞笑嘅係，連納智早前視察西九，居然幽咗港府一默，話三年半前來過，今日重臨舊地，令佢驚奇嘅係，呢個地方竟然同三年半前一模一樣。嗱，連納智唔該醒醒定定，如果三年後西九地皮仍然原封不動，畀人笑到面黃嘅就唔只港府高官，你都走唔甩㗎！