天風吹，日觀群鴿踏浪來；華燈上，但見碩鼠亂舞動香江。嘩！咁正，邊度有得睇？嘻！就喺日間旅客雲集的尖沙咀「五支旗杆」一帶。如何發現一個城市的魅力？有人話城市個性也是一種軟實力，正如人們通過街頭樂團認識維也納，通過保持完好英倫範兒的老城區認識倫敦，通過休閒與田園認識「第四城」成都。如今，香港呢粒「東方之珠」，我們也可透過鴿群鼠舞去感受香港的城市魅力！
老朽真係要感謝本報突發組記者咁正嘅「專題新聞」，令我呢個退休人士又多個景點hea吓！最過癮嘅——在記者鎂光燈面前，旁若無人只顧四處覓食嘅老鼠，擺出不怕人的樣子。阿哥，香港人權倒退，分分鐘穿「六+四」嘅球衣落街，都會被幾個彪形大漢抬咗去北大荒。人權倒退，鼠輩囂張，呢個現象未必係法治嘅墮落，從逆向思考，你精鼠更精，鼠大哥大姐已劃定「五支旗杆」一帶係佢哋嘅「核心保安區」，不然，何以光天化日旁若無人，自顧自覓食？
老朽讀薛鳳旋教授嘅《中國城市及其文明的演變》，知道美國學者芒福指「城市是文明的心臟地區」；英國歷史學家湯恩比認為「城市的歷史是人類整體歷史的組成部分」。好咯！如今有鴿糞和鼠群構成這好客之都的文明元素，它們都是目前文明的空間集中地，而不是另一種文明。事實是，經本報轉介而食環署派人調查後表示，期間未有發現鼠蹤或有人在場餵飼白鴿，附近一帶衞生無問題。老朽只能怪鼠輩未能善用核心保安區。