民主黨總幹事一職，自從陳家偉因為「香檳訪談記」而辭職後，就由林卓廷上任，但佢未坐夠一個月，黨內已經傳出唔少關於佢嘅是非。有傳白鴿黨主席何俊仁出戰明年超級區議會，所以新界西直選個空缺，屬意由林頂上。不過，林就澄清話現階段無意出戰任何選舉，至於日後嘅嘢，就要睇時機喎。
有白鴿黨第二梯隊話，鐵頭仁親自挖林卓廷回黨，唔多唔少都代表投咗信任一票。鐵頭仁明年出戰超級議席後，新界西除咗李永達外，就無大將可以出選，本來最有機會頂替鐵頭仁嘅前秘書長張賢登，亦因患腮腺癌要避戰，至於屯門區議員陳樹英更被指未成氣候，所以鐵頭仁才急搵林卓廷回巢。
有人不滿話，雖然林卓廷做過三屆主席助理，熟悉黨內派系，但佢始終離開過一排，如今返入黨後可優先出選，難以服眾。我哋問過林卓廷，佢就話現時唔會講出選，事關係太長遠嘅事，總之依家會先做好自己總幹事嘅分內工作喎。