政情：區會副主席鬧林D9衰格
每逢有爭議性政策出台時，政府都會借諮詢區議會正、副主席過橋，扮到好似有聆聽「民意」，又聲言取得十八區支持。政制及內地事務局局長林瑞麟（林D9）尋日又重施故技，同班主席開會商討替補機制，但據聞因為國務院副總理李克強訪港，會期足足改咗三次，搞到唔少主席都好火滾，寧願唔應酬林D9以示抗議。
林D9會後話，十八區正、副主席都整體支持政府要堵塞漏洞，講到好似好多人撐佢咁，但實情唔係咁，事關尋日會期一共改咗三次，原定上個星期四，之後遷就李克強訪港，改到上星期五下午，之後又改上午，最後延遲到尋日先開到會，不但令部分主席就唔到期而缺席，最後林D9出來交代會議內容時更加係唱獨腳戲，冇主席肯企喺佢後面做布景板撐場。
深水埗區議會副主席譚國僑就狠批政府好衰格，原本得閒都畀政府搞到唔得閒。葵青區議會副主席麥美娟更鬧爆林D9，話政府無理過班區議員感受，好似當佢哋一定得閒。油尖旺區議會主席鍾港武，亦因撞期而無去，簡直係眾叛親離。